Konungsríki Þrumudrekans hátt upp í fjallasölum Himalæja

Flestir hvá þegar þeir heyra minnst á Bútan, enda vita greinilega fáir að til sé lítt þekkt, en þó fornt og sjálfstætt ríki á milli Kína og Indlands. Leyndardómar Bútans minnka ekki við nánari skoðun. Þeir hljóma eins og ævintýri, sem sannarlega reynist rétt í huga þeirra, sem sækja heim þetta fallega land.

Konungsríkið Bútan hefur verið lýst sem lifandi safni, síðasta vígi hefðbundins búddisma meðal fornra menningarsamfélaga Himalæjafjalla. Það er eitt einangraðasta og afskekktasta land í heimi. Fram til 1974, þegar síðasti alræðiskonungur landsins var krýndur, höfðu engir ferðamenn komist til Bútans; aðeins örfáir vestrænir vísindamenn og landkönnuðir höfðu átt kost á að skoða landið. Undir lok síðustu aldar var 200 ferðamönnum leyft að koma til landsins ár hvert, en frá aldamótum hafa ferðahömlur verið rýmkaðar verulega. Innan við 10 Íslendingar hafa komið til Bútan, en nú verður breyting þar á.

Það hljómar nánast eins og tekið úr skáldsögu eða vafasömum ferðabæklingi að til sé ósnortið, afskekkt, framandi og ævintýralegt konungsríki uppi í hlíðum Himalæjafjalla. Ekki er hægt að ímynda sér einstakari áfangastað en Bútan. Og til að toppa ævintýrabraginn nefnist landið "Þrumudrekaríkið" á máli heimamanna.

Bútan-búar virðast hafa farið rétt af stað í ferðamálum – og stjórnvöld harðákveðin í að halda því þannig. Takmarkaður fjöldi ferðamanna fær að heimsækja landið ár hvert, en aðeins með talsverðum skilyrðum, svo sem hvað snertir útgjöld. Í Bútan eru heimsóknir ferðamanna ríkisstýrðar, með meðfylgjandi kostnaði við allt sem viðkemur dvöl þeirra í landinu. Þeir sem hafa ekki digran ferðasjóð í hendi eru að sjálfsögðu óánægðir með þessa tilhögun; en sparibaukar voru fundnir upp með ákveðið markmið í huga! Stjórnvöld gæta þess vel, að stór hluti tekna af ferðaþjónustu skili sér í viðhald og uppbyggingu nátturu og arfleifðar lands og þjóðar.

Undirbúningur og rannsóknir Óríental á þessu fjarlæga landi hafa staðið yfir sl. 2 ár. Það er fyrst núna, að fyrirtækið er tilbúið til að leiða hóp ferðafólks um þá einstöku stíga, sem liggja um fjöll og firnindi, þorp og bæi konungsríkisins fjarlæga.

Ævintýrið um konungsríki Þrumudrekans

Ímyndum okkur konungsríki, þar sem hamingja þjóðarinnar er mæld fremur en þjóðarframleiðslan, menning og hefðir hafa haldist nánast óbreyttar frá 7. öld í samhljómi ósnortinnar náttúru og torfærra fjalllenda. Þetta er Bútan – konungsríki Þrumudrekans.

Landkönnuðir og ferðahetjur hafa fært hinum vestræna heimi sagnir af þessum einangraða stað, sem sumir telja að sé fyrirmyndin að Sjangríla – hinum útópíska Edengarði, sem lýst er í bókinni Lost Horizon eftir James Hilton og hefur verið mörgum ævintýraþyrstum einstaklingum hvatning til landkönnunar.

Í einangruðum sveitum Bútan finnast lítt þekktir minnihlutahópar og flökkuþjóðir, sem haldið hafa einkennum sínum fram á okkar daga, þökk sé illfærum fjöllum og torfærum dölum.

Í innstu fjallasölum Bútans leynast helgidómar og fögur búddaklaustur, sem verið hafa heimspekingum, lærimeisturum og einsetumönnum friðarból til íhugunar og bænagjörða, en talið er, að í Bútan hafi búddisminn varðveist tærastur í aldanna rás.

Hvað á landið að heita?
Heimamenn nefna land sitt Druk Yul, sem þýðir Land þrumudrekans. Það hefur þó verið þekkt undir mörgum öðrum nöfnum, t.d. Lho Mon, sem þýðir "Suðurland myrkursins", Lho Tsendenjong sem útleggst "Suðurland Sandalviðarins", Lhomen Khazhi eða "Suðurland fjögurra aðkomna" og einnig Lho Men Jong, sem hægt er að þýða með "Suðurland læknajurtanna". Suðurlandstitillinn kemur til af því, að flest viðurnefnin eru jafnan ættuð frá Tíbetum, nágrönnum þeirra í norðri.

Sunnlendingar á Íslandi ættu því sérstaklega að gefa þessu fallega landi gaum, þó ekki sé nema vegna þessa merkilega skyldleika!

En hvað skyldi orðið Bútan merkja? Það hefur ekki verið fyllilega staðfest, en hugsanlega er það dregið af sanskrítar orðinu “bhu-utthan”, sem merkir hálendi. Samkvæmt annarri kenningu, sem er einnig lögð út af sanskrít, mun Bútan standa fyrir “bhots-ant”, endamörk Tíbets eða suður af Tíbet.