Singapúr

Evrópsk-asískur kokteill

Singapúr er sérkennilegur kokteill kínverskrar, evrópskrar, indverskrar og malasískrar menningar. Borgríki þetta á sér hvorki fyrirmynd né eftirmynd. Stjórnsýsluform þess byggist á hugsjónum og framtíðarsýn eins manns; Lee Kuan Yew og stöðu borgarinnar sem verslunar- og fríhöfn á stjórnartíð breskra nýlenduherra.

Í Singapúr er snyrtimennska í fyrirrúmi og reglusemi mikil, þó undir niðri kraumi hinn asíski og exótíski glundroði. Slíkt opinberast í magnaðri matargerð, villtum skemmtistöðum og með ýmsum öðrum hætti. Singapúr er, ásamt Hong Kong, vagga hinnar kínversku matargerðar, eins og við þekkjum hana á Vesturlöndum. Þeir sem vilja borða góðan mat á glæsilegum veitingastöðum og njóta lífsins á úrvals skemmtistöðum finna fáa staði hentugri en einmitt Singapúr.

Singapúrar eru stoltir af góðri sambúð ólíkra menningar- og þjóðabrota, ólíkt því sem gerist víða annars staðar. Bænasöngur múslima berst yfir hindúamusterin og kirkjuklukkurnar hljóma í bland við búddískan trumbuslátt. Kínahverfið, Litla Indía og hverfi Malæja eru svo svipsterk og skýr, að menn upplifa eins og þeir séu staddir í móðurlöndunum sjálfum. Skammt undan er svo umhverfi og stemning, sem Evrópubúar finna sig eins kunnuga og heima fyrir.

Singapúr er staður þar sem allir geta fundið eitthvað við sitt hæfi - þar sem allir geta fundið sig heima eða að heiman, eftir því hvaða væntingar menn bera í brjósti. Singapúr er einfaldlega staður sem hvergi er annars staðar að finna á jarðarkringlunni.